كلام الناس زى الصخور---الشاعر العجوز

كلام الناس زى الصخور
لو شلته على ضهرك
ضهرك هينكسر
و لو حطيته تحت رجليك
تطلع على الصخور لفوق
 و تكبر و تنتصر

الصخور االى على ضهرك
تخليك تبص لتحت
و الصخور اللى تحت رجليك
تخليك تبص لفوق
و اللى يبص لتحت
ينزل تحت
و اللى يبص لفوق
 يطلع فوق

و بعدين
تعالى اقوللك كلمة
هوا الناس وراها حاجة غير الكلام
ما لو كان وراهم حاجة
كانوا عملوها
و لو كانوا يقدروا ينجحوا
ما كانوا نجحوا
و بطلوا يكلموا
بس اصل الكلام غيتهم و سلوتهم
 و عمرهم ما هيبطلوها

انسى الناس و كلام الناس
و انوى تنجح
و اجرى زى الرهوان
و هتستغرب اوى
لما تلاقيهم ورا بيصغروا
 و انت بقيت اول الفرسان

يا اخى انساهم و كلامهم
الله يخليك
و هتستغرب اوى اما يقولولك
بعد ما توصل
ادينا من اللى ربنا اداك
يا ريته يزيدك مقام و يدعولك
هوا ده طبع الناس
يا عمنا و عم الناس
الشاعر العجوز