قصيدة بعنوان(صدقيني)
صدقيني لما أقولك
قلبي مش مرتاح ف حضنك
واني مدفون جوه منك غصب عني
واني بعشق كل تفاصيلك وحسنك غصب عني
وبنجرح
من حضنك البردان وإحساسي بقساوتك
تنكسر ف عنيا صورتك
أجمع الألم اللي ساري بين ضلوعك جوه مني
وأحضن الحلم اللي بينور ف صبحك
وأبتسم ...وأنا بنجرح من جوه روحي
أبتسم
وأتنفس النور اللي ساكن بين ملامحك
مين فاضلك غير سنين العشق بيا تفكرك
أنا كنت فوق وش الزمن حاضن ترابك
رغم موتي ورغم جرحك
دمي كان سرسوب ربيع يلضم بروحك خطوتي
تجري ف عروقي محبتك
ومحبتي وطنك وضلك
كنت نيلك لوعطشتي أصب ف وريدك أمل
وإن جف نبضك أوهبه بروحي الحياه
وأتنفسك جوايا روح مدت جسور العشق مرسي للنجاه
توصل لبرك
صدقيني لما أقولك
قلبي مش قادر يشوفك
وانتي لسه بتنحني
وتبوسي إيد كل اللي باعك بالرخيص
وتيتمي الأحلام بخوفك
وتبعيها للخسيس
صدقيني
ببقي شايف طلتك شوق بيناديني
بس لما بروح لحضنك
شئ ف حضنك بيجافيني
وشوقك المجروح بيدبح خطوتي
لما ف غلاوتك تخدعيني
لا عدت أصدق ضحكتك
ولا هبتسم
ف عنيكي وانتي بتدبحيني
صدقيني
محمد محمد الطنطاوي
14/11/2016
ليست هناك تعليقات:
إرسال تعليق