بسم الله الرحمن الرحيم
قلوب من ذهب
كلمات / أحمد عبد اللطيف النجار
شاعر أم الدنيا
مش كل قلب يحضنك
حضنه يداويك
ولا كل وش يشكرك
شكره يراضيك
ولا كلمة قولتها
صوتها يناديك
أصل القلوب متنوعة
قلوب حقيقي من دهب
سبحانه ربي اللي وهب
وقلوب بتتحمل آسية
ترد علي القسوة بهدية
تقبل الاعتذار وتبقى
مع نفسها كدة متراضية
وقلوب كتير عكسها
دايماً تكّشر وشها
تغضب حتى من نفسها
ولو حاولت تردها
ترفع عليك مليون قضية
وقلوب شايفها ...
قايدة نار
جمرها جواها ثار
رافضة الندم والاعتذار
ولو حاولت فهمها ..
تقول لك الناس مفترية
وقلوب بالأحقاد تغِل
تقول للفرح ابعد وقِل
فيها الشجن دايما يحِل
ولو حاولت في سعدها
تنطح مشاعرك بالروسية !
وقلوب عذارى ....
قلوب صبية
شايفها حلوة مستحية
تضحك لك من غير مجاملة
لأنها مش عاملة ، عاملة
ولا طالبة منك أي دية
وقلوب حقيقي مؤمنة
دايماً كدة مطمنة
تصبر سنين ..
مليون سنة
راضية بحكمة ربنا
وسعدها ، سعد وهَنا
الله علي قلوبكم يا ناس
لو ترضى وتسامح بجد
تعتذر ومش تكابر
ما يكون لقاها نار وصد
تبني حواجز علي النفوس
ونشوف طريقها آخره سد
ممكن نفهّمها ، نقول
ونسمع منها أحلى رد
هيا الحياة فيها إيه يساوي
نعيش كدة متغربين
نقابل الضحكة بعبوس
وبقسوة علي بعض ندوس
ومش نقول متأسفين
مش نقول متأسفين
مش نقول متأسفين
أحمد عبد اللطيف النجار
شاعر أم الدنيا
ليست هناك تعليقات:
إرسال تعليق